Di official portrait of Donald Trump
Di official portraits of US President-elect Donald Trump and im second-in-command JD Vance don come out ahead of dia inauguration on Monday.
Both Trump and Vance wear blue suits for di foto, wit white collared shirts and blue ties, Trump wear one small US flag pin for im lapel.
Trump facial expression different from Vance own, di president-elect head bend slightly downward, im raise one of im eyebrow and im lips press togeda.
While Vance smile at di camera, and cross im arms, for a more relaxed pose.
Many pipo dey compare di new image of Trump to im 2023 mugshot, wey im bin take for Fulton County prison afta dem bin charge am wit attempting to overturn im 2020 election loss to Joe Biden for di state of Georgia – charge wey Trump don deny.
Trump bin use dis now-famous image to raise funds for im campaign.
Di Trump-Vance transition tok for press release say di foto dem “go hard”.
Di portrait wey Trump choose dis time different wit di image im bin use for 2017, wen im bin first become president.
Although im wear similar attire, im bin smile well-well for di camera for di earlier portrait.
“Trump fit dey embrace a defiant image, transforming from one moment of legal adversity into a symbol of resilience and strength,” na wetin Quardricos Driskell, one political science professor for George Washington University, tell BBC.
“Di big difference to im earlier, more traditional portrait fit also signify a shift for im public persona, to show a tougher, more combative stance as im prepare to assume office for a second time.”
Na Trump transition team release dis official foto just days bifor Trump and Vance inauguration on 20 January.
Tori be say dem no release di official foto of Trump and im former vice-president Mike Pence until nine months afta dia swearing-in.
Di official portrait of JD Vance