Dem dey treat Pope Francis for one
Dem dey treat Pope Francis for one “tough clinical situation” and e go remain for hospital for as long as necessary, di Vatican tok.
Dem admit di 88-year-old to Rome Gemelli hospital on Friday to undergo treatment and test for bronchitis.
For one update on Monday, di Vatican tok say di Pope get “polymicrobial infection” of im respiratory tract, and dis go require change in treatment.
Bifor im admission last week, di Pope get bronchitis symptoms for several days and e don delegate officials to read speeches for events.
Vatican tok-tok pesin Matteo Bruni don tell tori pipo on Monday say di Pope dey in good spirits.
One statement on im condition tok say: “All tests wey dey carry out to date dey show tough clinical fotos wey go require appropriate hospitalisation.”
Ova di weekend, di Vatican tok say di Pope condition dey stable and dem don tell am to get “complete rest” for quick recovery.
E no fit hold im regular weekly prayer on Sunday for St Peter Square or lead special mass for artists to mark di Catholic Church Jubilee Year.
Di Argentine Pope don spend nearly 12 years as leader of di Roman Catholic Church.
E bin don spend three nights for di same hospital in March 2023 for bronchitis treatment.
In December di same year, dem force am to cancel im trip to di United Arab Emirates for di COP28 climate summit becos of anoda sickness.
E don suffer from some health issues throughout im life, including having part of one of im lungs remove at age 21.