Alex Ikwechegh, a House of representative member
Di Nigeria Police don begin to dey prosecute di Abia lawmaker wey dem catch for video dey assault one Bolt driver for Abuja.
Na on Sunday di mata bin happun wia Oga Alex Ikwechegh, a House of representative member bin get gbege wit Bolt driver, Stephen Abuwatseya wey come deliver goods to am.
According to informate wey di police tok-tok pesin Olumuyiwa Adejobi bin make public on Wednesday 30 October, dem don begin dey prosecute di lawmaker for assault.
Dis mean say di police go begin investigation into how di lawmaker assault di Bolt driver.
Wetin happun bifor
Wen di mata bin happun and di video go viral for social media, Abuja Police Command bin arrest lawmaker for assaulting di driver.
Di Abuja police tok-tok pesin, Josephine Adeh, confam say Alex Mascot Ikwechegh bin dey police custody and dem dey kwesion am.
Police say dia investigation show say oga Ikwechegh “physically assault” di bolt driver wey deliver package to Oga Ikwechegh.
“Di FCT Police Command express concern ova Ikwechegh dismissive attitude towards di office of the Inspector General of Police following di incident,” di statement tok.
“Currently, di suspect dey di Maitama Police Station undergoing questioning.”
How di mata take start
On Sunday, Bolt driver, Stephen Abuwatseya allege say Oga Alex Ikwechegh, a House of representative member assault am and tear im cloth wen e go deliver package to am for im house in Abuja.
Inside one video wey dey spread for social media, di bolt driver request for im money but di lawmaker refuse say im no go pay di driver becos of disrespect.
Oga Ikwechegh insist say e no go pay di driver, and as im dey express im anger e call di business owner to report di delivery man while making threatens say e go “make dis man disappear in di whole Nigeria and notin go happun.”
Di lawmaker and driver begin exchange words ova di matta and di lawmaker waka towards di driver, wit sound of phisical attack.
Oga Abuwatseya allege say di lawmaker slap am three times for di video ” Are you slapping me sir?”
“You dey look me and tink say you fit beat me? Who do hell you tink you dey follow tok. You sabi who I be?”
Inside di second video, di driver allege say di lawmaker tear im cloth comot from im body “As una dey see I no wear cloth, e don tear my cloth e slap me three times……..”
Di lawmaker threaten am make im go report to di police “Call di Inspector General of Police. Call am, make im come here. Record me very well. You come my house, you disrespect me.”
Di driver respond say im no disrespect am, make di lawmaker pay am im money so e go fit comot.
Di lawmaker neva tok anytin on di mata since di video come out.
Who be Alex Ikwechegh?
Alex Ikwechegh begin im poltical career for 2019 as chairman for Aba North local goment in Abia state at di age of 28. Im kontinu as im seek election as representative for di North and South Federal Constituency.
E hold bachelor degree from University of Calabar wia e graduate wit degree in business management.
RULE OF LAW: POLICE PROSECUTES HON ALEXANDER IKWEGH FOR ASSAULT..
Details soon. pic.twitter.com/xM6axfaXGQ— Prince Olumuyiwa Adejobi (@Princemoye1) October 30, 2024
