No only 15 days to go until election day for United States wey go happun on 5 November.
Election fever don dey increase as di candidates continue wit dia campaigns across key swing states wia a Democratic or Republican fit win.
Dis election initially for be rematch of 2020 but tins change for July wen President Joe Biden end im campaign and endorse Vice-President Kamala Harris.
Donald Trump wey lose to Biden go face Harris for dis race.
As di election don dey near, dis na di latest big developments you need to know.
Polls for seven swing states tight well-well
With just two weeks to go until election day, polls for di seven swing states continue to dey very tight – and both Donald Trump and Kamala Harris dey focus dia efforts in winning over voters there dis past few days.
Harris spend Monday visiting Pennsylvania, Michigan and Wisconsin, while Trump jet off to North Carolina, where e go hold rally for Greensboro today.
National polling averages show say na just one or two percentage points separate di two for battleground states – with Harris leading in three of di seven states by less dan one percentage point, and Trump currently ahead by less dan one percentage point in Pennsylvania and North Carolina, and by two points for Georgia and Arizona.
Meanwhile, anoda poll suggest say neither Kamala Harris nor Donald Trump get upper hand for di presidential race, one new poll suggest.
For di handfull of swing states wey likely to determine di election, Harris and Trump dey tied at 47%, di Washington Post-Schar School poll stok.
Di battleground states na Arizona, Nevada, Georgia, North Carolina, Wisconsin, Pennsylvania and Michigan.
Di poll dey suggest say Trump strong well-well for Arizona – one state Joe Biden win for 2020 – wit a six point lead among registered voters.
Harris get her largest margin – six points – for Georgia.
Biden surprise victory for Georgia for 2020 na di first by a Democrat in decades. Na also Republicans most narrow defeat.
Trump dey predicted to get a slight edge over Harris but dem tie for battleground states, polls tok
Donald Trump dey predicted to get a slight edge over Kamala Harris for di Economist electoral win model for di first time in two months.
Di weekly newspaper now project say Trump get a 54 in 100 chance of winning di election, while im opponent dey shown as coming out on top 45 times out of 100.
Di August edition of di model indicate many undecided and third-party voters dey lean towards Harris, but with only 15 days to go before polling day, some of dem now appear to don throw dia support behind Trump, di poll suggest.
Trump chances of heading back to di White House now dey 8% higher dan e dey just last Friday, according to di Economist predictions.
Meanwhile, anoda poll suggest say neither Kamala Harris nor Donald Trump get upper hand for di presidential race, one new poll suggest.
For di handfull of swing states wey likely to determine di election, Harris and Trump dey tied at 47%, di Washington Post-Schar School poll stok.
Di battleground states na Arizona, Nevada, Georgia, North Carolina, Wisconsin, Pennsylvania and Michigan.
Di poll dey suggest say Trump strong well-well for Arizona – one state Joe Biden win for 2020 – wit a six point lead among registered voters.
Harris get her largest margin – six points – for Georgia.
Biden surprise victory for Georgia for 2020 na di first by a Democrat in decades. Na also Republicans most narrow defeat.
BBC too dey also track national polls to keep track of who dey lead as we approach decision day.
Early voting
Voting dey go on for states wey dey allow pipo to cast dia ballots before election day on 5 November.
Millions of Americans choose to vote early, rather dan wait for election day. Dem dey do am by voting physically or through post, depending on individual state rules.
Just ova a million pipo don already vote for North Carolina as of Sunday, according to di state Board of Elections.
For 2016, more dan 58 million ballots na im dem record ahead of di election.
Four years later, dat figure jump to ova 101 million – around two-thirds of all votes – afta states bin change di rules sake of Covid-19 pandemic.
Pennsylvania last day to register to vote na Monday
Pipo wey dey live for di important swing state of Pennsylvania get less dan 24 hours left to register to vote.
Late on Sunday, Donald Trump tell pipo to sign up, im write on social media say “Christians dey under attack from dis administration”, im tok as im encourage im supporters to vote early.
Both im and Kamala Harris dey campaign well-well for Pennsylvania, di state wey get a population of 13 million pipo and e get 19 electoral college votes – dis make am di joint-sixth most valuable for di electoral college.
Donald Trump bin secure an important victory ova Hilary Clinton dia for 2016, e win di state by around 44,000 votes – but im chop defeat dia four years later by 80,000 votes, na key gain for Joe Biden.
At di moment, polling suggest say Pennsylvania dey too close to call – and both candidates know say without am, dia path to victory go dey difficult.
‘Investigate Musk $1m-a-day giveaway’
Elon Musk plan to give $1m (£766,000) a day to a registered voter for key swing states until di US presidential election.
Dem go choose di winner randomly from di pipo wey sign petition wey di billionaire campaign group AmericaPAC set up to support Donald Trump.
For Pennsylvania, Musk dey give voters $100 for signing di petition, plus anoda $100 for each pesin wey dem refer wey sign. Voters for oda battleground states dey get $47 per referral.
Some experts believe say dis strategy to encourage voter registration dey illegal and Pennsylvania Democratic Governor Josh Shapiro don call for investigation into di “deeply concerning” scheme.
BBC bin contact Musk and im campaign group for comment.
Trump serve for McDonald
Trump serve fries for one McDonald shop near Philadelphia. Im campaign bin stage di appearance in a bid to sow doubts about Harris story of working for one of di California branch for di Golden Arches during her college years.
“Dis na fun oh! I fit do dis all day,” im tok for di outlet for Feasterville-Trevose, wey dey part of Bucks County.
“Dis na for di fake news,” im tok, bifor im pass French fries to reporters through di drive-through window.
“Now I don work [at McDonald’s] for 15 minutes more dan Kamala,” Trump wey dey fond of Big Macs and Filet-o-Fish sandwiches tok.
Di Harris campaign react to Trump accusations, her tok-tok pesin Ian Sams tell BBC say: “Wen Trump dey feel desperate, all im know how to do na lie.”
Di campaign add say di vice-president bin work on di cash register, ice cream machine and fry machine for Central Avenue McDonald wey dey for Alameda, California, for summer of 1983.
Kamala Harris dey visit three battleground states
Di vice-president don schedule town hall appearances for Pennsylvania, Michigan and Wisconsin wit former Republican Congresswoman Liz Cheney, e go dey moderated by Republican strategist Sarah Longwell and conservative commentator Charlie Sykes.
She dey visit dis states on Monday.
Na dis kind of events wey Republican presidential candidate like Mitt Romney or George W Bush for hold years ago.
Harris dey try to convince independent and Republican voters for di suburbs of those states largest cities – Philadelphia, Detroit and Milwaukee – to support di Democratic ticket.
If she fit make progress among di college-educated professionals wey bifor bin support Republicans, e fit offset gains wey Trump don make among blue-collar, minority and union voters.
Dis na sign of how di coalitions wey dey support di two major parties dey shift in di era of Donald Trump.
Meanwhile, Donald Trump don go North Carolina, wia im dey visit di city of Asheville to see di full damage Hurricane Helene bring come di state last month.
